Pedagogika va psixologiya fakulteti

Pedagogika fakulteti o‘z faoliyatini 1935-yildan “Maktabgacha tarbiya guruhi” sifatida boshlagan. O‘sha davrda fakultetning 1-kursiga 20 nafar talaba qabul qilingan bo‘lib, maktabgacha ta’lim muassasalari uchun oliy ma’lumotli mutaxassislar tayyorlash bo‘yicha Farg‘ona vodiysida yagona, respublikada esa ikkinchi ta’lim maskani hisoblangan.

Fakultet tarixida O. Muhammadjonov, Z.A. Kalonxo‘jayeva, B. Ibragimov, N. Yoqubov, M.M. Hoshimova, O‘. Toshtemirov, L. Zohidov, R. Hoshimov, S. To‘ychiyev, S. Obidjonova, N. Erkaboyeva, G‘. Najmiddinov kabi professor-o‘qituvchilarning hissasi katta bo‘lgan.

1998-yilda Pedagogika fakulteti boshlang‘ich ta’lim metodikasi hamda pedagogika-psixologiya fakultetlari negizida kengaytirildi. 2005-yil sentyabr oyida musiqiy ta’lim yo‘nalishi ham fakultet tarkibiga qo‘shildi.

O‘zbekiston Respublikasi Xalq ta’limi vazirligining 2015-yil 28-fevraldagi 52-sonli buyrug‘iga muvofiq fakultet tarkibiy tuzilmasida o‘zgarishlar amalga oshirildi. Natijada boshlang‘ich ta’lim metodikasi hamda maktabgacha ta’lim yo‘nalishlari alohida fakultetlarga ajratildi. 2015-yil mart oyida esa Mehnat ta’limi hamda Tasviriy san’at va muhandislik grafikasi yo‘nalishlari Pedagogika fakulteti tarkibiga qo‘shildi.

2019-yil oktabr oyidan boshlab Musiqa ta’limi, Tasviriy san’at va muhandislik grafikasi hamda Mehnat ta’limi yo‘nalishlari “San’at” fakulteti tarkibiga o‘tkazildi. Shu yilning o‘zida (12.10.2019, №800-U buyrug‘iga asosan) Pedagogika fakulteti negizida “Maktab menejmenti” ta’lim yo‘nalishi tashkil etildi.

2019–2020 o‘quv yilidan boshlab fakultetda 5 ta bakalavriat yo‘nalishi va 3 ta magistratura mutaxassisligi bo‘yicha kadrlar tayyorlash yo‘lga qo‘yildi. Shu bilan birga, 2019-yilda “Umumiy pedagogika va psixologiya” kafedrasi fakultet tasarrufiga o‘tkazildi.

Fakultetga 1998–2005-yillarda N. Erkaboyeva, 2005–2008-yillarda dotsent I.P. Po‘latov rahbarlik qilgan. Hozirgi kunda fakultetga pedagogika fanlari doktori (PhD) N. Erkaboyeva rahbarlik qilmoqda.

2023–2024 o‘quv yilidan boshlab fakultetda ta’lim yo‘nalishlari yanada kengaytirildi. 2025/2026 o‘quv yilidan esa Psixologiya yo‘nalishi bo‘yicha masofaviy ta’lim hamda Maktabgacha ta’lim yo‘nalishi bo‘yicha kechki ta’lim shakli yo‘lga qo‘yildi.

Bugungi kunda fakultetda jami 11 ta ta’lim yo‘nalishi bo‘yicha:

 kunduzgi ta’limda – 1587 nafar;

 sirtqi ta’limda – 990 nafar;

kechki ta’limda – 54 nafar;

masofaviy ta’limda – 59 nafar talaba tahsil olmoqda.

Hozirgi kunda Pedagogika fakulteti tarkibida quyidagi kafedralar faoliyat yuritadi:

 Pedagogika

 Amaliy psixologiya

Maxsus pedagogika

 Maktabgacha ta’lim

Fakultetda ilmiy faoliyat ham izchil rivojlanib bormoqda. Professor-o‘qituvchilar ilmiy salohiyatini oshirish bilan birga xorijiy oliy ta’lim muassasalari bilan hamkorlikda ilmiy-tadqiqot ishlarini olib bormoqdalar.